النتائج 1 إلى 8 من 8
  1. مشاركه 1
    رقم العضوية : 18
    تاريخ التسجيل : May 2008
    المشاركات: 546
    التقييم: 465
    الدولة : العاصمة المقدسة / جدة
    العمل : ممرضة في مستشفى الحرس الوطني
    الهوايه : احب معرفة كل ماهو جديد في مختلف العلوم

    افتراضي فزعتكم يا أهل مكة


    بسم الله الرحمن الرحيم
    السلام عليكم ورحمة الله وبركاته

    كيييفكم ان شاء الله طيبين وحشتكم ولا لأ
    خلاص باقي دا الترم و ننتهي من الدراسة و الحمد لله ..

    جيتكم على السريع عشان اروح الحق التحضير و التدريس << صارت أبلة لكن مو أبلة أبلة .. تطبيق

    مشاركين في مهرجان الجنادرية و حنسوي غمرة مكاوية يوم الثلاثاء الجي ..

    اللي عرفتو للآن لبس الغمرة
    أكلة يسموها التعتيمة ..
    طيب ابغى اعرف هل كانو ينشدو اناشيد محددة زمان .. ومتى كان وقت الغمرة لخبطوني ناس يقولو بعد الفجر و ناس عصر .. ابغى الأصل القديم متى كانو يسوو ؟؟
    ممممممممممم كمان كيف كانو يزفو العروسة ؟
    و هل لبس الغمرة لو اسم محدد .. وحدة قالتلي يسمو زبون و لمن بحثت في النت طلع انو دا لبس لمرافقين يمشو جنب العروسة .. فمني عارفة مين الصح و في البيت ما عندهم خلفية قوية عن التفاصيل دي .. :(

    فقلت مالي حل غير أجي أسالكم محتاجة جدة أو ستو تقولنا التفاصييييل لا تبخلو بأي تفصيل مهما كان صغير
    أبغى أسويلهم غمرة قديمة أصيلة بدون أي خرابيط

    وبسسس و شكرا جزيلا على اللي حيساعدوني مقدما

    اشوفكم على خييييييييييير لمن اخلص الدراسة ههههه دعواتكم

    أبلتي .. د. أيمان . فوفا .. دايموند .. شوشو .. وكل الموجودين ان شاء الله تكونو بالف خير و صحة
    توقيع

  2. مشاركه 2
    رقم العضوية : 1
    تاريخ التسجيل : May 2008
    المشاركات: 16,199
    التقييم: 18026
    الدولة : ღ مملكـة الرضا ღ
    العمل : استشاري تربوي.خبير ومستشار الجودة، أخصائيOSHA،مدير موارد بشرية ومديرHACCP

    افتراضي




    تح ـية ملؤها الود والإحترام لكـے
    يـــــــا
    وردة العشاق
    أسعدنيے جميـل تواجدكے في
    ملتقانا المباركـے، أشكركـے من الأعماق على هذا الجمالـ ..
    ورود الكون لقلبكـے الطيب ..
    دمت ودامـ تواصلكـے الرائعے،،

    توقيع

    الجَودة ..هي ..العَودة
    لم نأتِ بجديد .. لكننـــــا نوضح الطريق...

    Saudi Arabia – Makkah
    mob: 0505574505
    E-mail : almalekah@al-malekh.com


    ليس المهم أن تكون ملكــــــاً .. ولكن المهم أن تتصـرف و كأنك ملكـ


  3. مشاركه 3
    رقم العضوية : 147
    تاريخ التسجيل : Jul 2008
    المشاركات: 5,138
    التقييم: 937
    الدولة : قلب أحبتي
    العمل : أستاذة فرنسي

    افتراضي رد: فزعتكم يا أهل مكة


    مساء الخير ورووودة اشتقنا لك كثييييير الحمد لله أتمنى تكوني بخير

    الله يوفقك

    توقيع

  4. مشاركه 4
    رقم العضوية : 3
    تاريخ التسجيل : May 2008
    المشاركات: 6,303
    التقييم: 3652
    الدولة : مكة حقنا^_^

    افتراضي رد: فزعتكم يا أهل مكة


    و أنا أقول الملتقى نوّر ليه؟؟؟

    أهلا و سهلا بالحلوين ..

    ياهووووه و الله وحشتينا..

    ربي يوفقك يا أبله <<<هددي بدفتر الدرجات و كله هيكون تمام


    بالنسبه لموضوع الغمرة ما لقيت شي ممكن يفيدك بعد ما بحثت في عمنا google

    بس لقيت أغنية بسيطة لمحمد حداد عن أهل أول مررره كيوت




    و إن شاء الله البقيه يساعدوكِ ..

    ربنا يوفقك يا قمر ..


    لا تطولي الغيبه


    دمتِ بخير n_n
    توقيع


    Diamond-Heart

  5. مشاركه 5
    رقم العضوية : 3916
    تاريخ التسجيل : Apr 2009
    المشاركات: 3,185
    التقييم: 1599
    الدولة : طيبة الطيبة
    العمل : جامعية ( الكلية الصحية )

    افتراضي رد: فزعتكم يا أهل مكة




    هلاااااااااا وغلا بوردة ملتقانا

    من طول الغيبات ...,,,,

    جد وحشتينا

    الغمرة ؟؟ ابدا ماعندي اي معلومة الان بس ابي اسال صديقاتي لاني مرة سمعتهم يتكلمون عن هالشيء
    توقيع
    التفاؤل نوع من السعادة ==>

    يمنحك هدوء الأعصاب وفي أحرج الأوقات

  6. مشاركه 6
    رقم العضوية : 18
    تاريخ التسجيل : May 2008
    المشاركات: 546
    التقييم: 465
    الدولة : العاصمة المقدسة / جدة
    العمل : ممرضة في مستشفى الحرس الوطني

    افتراضي رد: فزعتكم يا أهل مكة


    شوشوو امييين يارب وياكي .. حتى انتم لكم وحشة والله يسعدك ربي
    دودي الملتقى منور بأهلو
    يووو دولا البنات ما يخافو حتى مرة هددتهم الدرس مشروح وحدة تقول عادي نروح لابلة عبير تشرحلنا << و ابلة عبير مدرسة المادة و اساسا هيا نفسها تقولي لا تديهم وجه و لمن قلتلها اللي صار تقول هه كمان لسانين ههههه بالنسبة للغمرة خلاص صارت اليوم و اخدت كم كلمة مكاوية زي الحكاية كمقدمة و حاحكيكم بالتفصيل ايش صار مررة تسلمي على المساعدة
    الاغنية مرررررررررة خطيرة كنا حنقولها في الاخير لكن البنات حقون المشهد خبصو الكلام ونسيو و سوو هوايل فكنسلتها ..:(
    حارجعلكم ان شاء الله بس اخلص الربشة اللي انا فيها دعةاتكم بكرة اختبار مادة اختبارات و مقاييس @_@

    ملاااك مررررررة ميرسي .. ههههههههههههه انا طولت الغيبات لكن جية بخفي حنين لكن حاديكم المعلومات اللي لقيتها عن الغمرة زمان في مكة كيف كانت .. و حانزلكم مقطع الدف اللي شغلتو رغم كان بودي ازف البنت بدفوف حقيقة لكن ما توفرت :(

    يالله سي يو تومورو و انتظرو المعلومات و الحكاية رايحة اذااكر
    توقيع

  7. مشاركه 7
    رقم العضوية : 18
    تاريخ التسجيل : May 2008
    المشاركات: 546
    التقييم: 465
    الدولة : العاصمة المقدسة / جدة
    العمل : ممرضة في مستشفى الحرس الوطني

    افتراضي رد: فزعتكم يا أهل مكة


    جيييتكم بالتفاصيل زي ما وعدتكم :)

    1/ تم جمع المعلومات عن غمرة أهل مكة زمان و كانت كالآتي ....
    - العروسة تلبس أي لبس مطرز يشبه في تطريزه البنجابي الهندي .. مع تغطية وجهها بالرشرش الدهب و ما يظهر غير عيونها و ما تحط حتى كحل .. وحتى شعرها تحت طرحة مطرزة ..
    - العروسة لمن تنزف للمعازيم كانت تنثر عليهم الحلوى أو المكسرات و يسموها النُقل .. ( شوية حمص على فصفص على حلاوة دائرية ملونة و اشياء نسيت اسمها )
    - العروسة نتزف بطريقة عجيبة و هي انها تطلع فوق كرسي و توقف و احد من اخواتها او صديقاتها ياخدو كرسي تاني يقدمو و تنتقل عليه و يروحو يشيو الكرسي اللي كانت واقفة عليه و يحطو قدامها و هكذا من كرسي لكرسي الين توصل للمكان اللي حتقعد فيه . . وهناك في تبسي محطوط عليه ( زبدية فيها الحنة و عليها شمعة @_@ / و مرشات الورد / و مبخرة / و في نفس التبسي فواكه منوعة عليها اكليل يتأكل تقول مرة عمي حاجة يسمو اكليل تلاقوها عن العطار معرفها لحد يسالني ايش هيا @_@ )
    - المكان اللي تقعد العروسة فيه يسمو خِدر العروسة و يكون له ستارة تجلس العروسة وراها و المنقشة تدخل تنقشها و محد يشوفها ولا هيا تشوفهم لكن تسمع الاهازيح و الحفل .. وممكن لمن تنتهي النقش تندر يدها برى الستارة عشان توري المعازيم وزي دا :)
    - بعد ما تتحنى كانت تفرد يدها و يحطولها مناديل ورق و يجو البنات اللي ما تزوجو او انخطبو ياخدو شويا حنة من الزبدية و يحطولها هيا في يدها بالبركة عشان يعني يلحقوها هههههههههههه
    - المعازيم ياكلو اكلة اسمها التعتيمة و هيا النواشف اللي ياكلوها اكل مكة زمان حلاوة و جبن و زيتون و لبنية و مفروكة و عيش شريك و هكذا ..

    اللي صار بعد جمع المعلومات انو الخبر ادونا هوا من قبل الاجازة انو لو حابين نشارك في مهرجان الجنادرية نشارك .. بزميلاتي حبو يسوو زفة عروسة و يجيبو نقاشة للمدرسة و السبت تم التأكيد انو الحفل حيكون يوم الثلاثاء و طبعا نحنا مع دوشة التحضير و اختبارات الجامعة في عالم تاني .. انا اخدتها فرصة حصص الانتظار وكلمت طالباتي اللي ادرسهم 1/1 و بنات من سنة تانية فرفوشين تحسوهم حقين شغل و كدا و قلتلهم فكرة الغمرة .. اتفاجات يوم الاحد يجوني البنات وحدة تجيب الفضة حقت امها حقت الغمرة و قالت اللبس اسود قلتلها جيبي .. و اتحمست من حماسهم رجعت البيت سويت اتصالات و بحثت اكتر عن الغمرة المكاوية و طلعت المعلومات اللي شفتوها ..
    و كتبت سيناريو مكاوي بين ام و بناتها و كيف جهزو خدر اختهم و التعتيمة و لمن جا اليوم الثاني استقبلو الضيوف و صارت الزفة << اختصار السيناريو .. طبعا الحوسة كانت في ايجاد لبس غمرة مناسب لانو البنات يوم الاثنين جابو لبس عبارة عن ثوب جيزاني و لا يشبه لبس الغمرة المكاوية .. فاحترت من فين اجيب لبس غمرة و كنت محتاجة دفوف كمان عشان مخططة ازف البنات على الدف ..
    الموهم قدرت بعدين اخترع لبس :) ارسلتلي مرة عمي لبس من برى شفاف قماشو اشبه بقماش التل ومن جوه لونو وردي غامق .. و اخدت معايا وشاحات فساتين الافراح حقتي .. سكري و كم وشاح بدرجات الوردي << الحاجة ام الاختراع .. ودا الكلام ليلة الثلاثاء @_@ و دورت على صوت دفوف و مجس حجازي و اتخيلت زفة حلوة و غيرتها شويا عن اللي المفروض اسويها عشان لا تصير لخبطة .
    و اخدن مرشات و طلبت من البنات اللي عندها مرش تجيب .. و زبدية قديمة فيها الحنة و تبسي دهبي قديم و مبخرة وحدة من البنات جابتها برضو لونها دهبي .. الموهم تبسي الحنة حطيت فيه ( زبدية الحنة مبخرة - 3 مرشات - طاسات بحجم الكف صغيرة لونها دهبي حقت الزمزم << اختراعات هههه ) و طلع شكل التبسي حلو كلو دهبي في دهبي ماعدا الزبدية طبعا ...
    و اشتريت لوازم النقل و طلبت من وحدة من زميلاتي تروح مهجة تشتري اكياس صغيرة و حنة .. وزعنا النقل و الحنة في الاكياس لتوزيعها على المعلمات و طبعا فرقنا الحنة عن النقل عشان الريحة @_@
    و دي الترتيبات كلها في المدرسة الصبح رحنا كلنا بدري لو تشوفو غرفتنا صارت كانها غرفة ام العروسة طبعا جبت البنت و هلكتها مسكينة اول لبسناها اللبس كلو طلع مو حلو فسخنا اللي جوه و خليتها تلبس القماش الخفيف على المريول و طلع شكلها حلو لبسناها الاكسسوارات حقت الغمرة و خليتها تلف الشال السكري زي الطرحة و رميت الشال الوردي على راسها فصار شكلها حلو و لا كانو اللبس مخترع كانو لبس غمره هههههه .. و بس قعدت .. و جهزت البنات و ناحلوني في التدريب اعطيتهم النص و السيناريو الاثنين على اساس يحفظو وكل وحدة تقول جملة و اغلب المشهد ايماءات .. تفاجات انو اساسا ما عندهم روح التمثيل و تمثيلهم بارد @_@ و اانواع التعصيب ..
    جات النقاشة قلتلها حتنزف معاهم و شافت التدريبات اتحمست تقول تبغى تغطرف ههههههههههههه .. و قلتلها انها حتنقشها فوق المسرح محل ما سوينا الخدر ..

    الموهم بدأت فقرتنا بعد طول انتظار و دا اللي صار ...
    البنات في المشهد اللي قبل الزفة خبصووو .. نسيو الحوار .. كل وحدة تتكلم كانها حافظه .. انا انقهرت ولا على قد التدريب قبل شويا @_@
    و لمن جات فقرة انو الام تستاذن تجيب العروسة قلتلهم انا حاشغل الجسيس تمشو من فوق قريب من السور عشان يشوفوكم المبخرة اول بعدين التبسي بعدين العروسة و جنبها الام ماسكة كيس من سعف النخل فيلو ورد عشان ترمي على البنات .. بعدين بنتين وحدة شايلة دورق زمزم و التانية كيس من السعف فيلو النقل .. و بدأ المجس و هما ما ظهرو @_@ تأخرو شويا .. و ظهرو
    أول ما ظهرو المدرسة كلها زعيق ههههههههههه الزفة انزبطت .. و مشيووو الين نزلو الساحة .. الساحة انا طلبت سلفا من الابلة تقعد البنات على الجنبين و تخليلي النص فراااغ .. و كان ليا ما طلبت و قلتلهم يمشو للنص ما ينزلو الين يسمو الدفوف و أأشر ههههههههههه انو وقفو في النص ..
    الموهم انتهى المجس و بدأ ضرب الدفوف .. و انواع الزعيق و كانها زفة حقيقة لقيت الكل تحمممممس و البنات غطاريف و زعيق و تصفير .. الين وصلت العروسة للمسرح .. اول ما وقفت و التفتت للبنات .. اسمع البنات في المدرسة على صوت واحد يقولو ( الف الصلاة و السلام عليك يا حبيب الله محمد لولولولولولولوووليييي ) ههههههههههه و ربي مخابيل ..
    الموهم انا قلتلهم انو اول ما تطلع العروسة اللي يمثلو ضيوف يسوو انهم يسلمو عليها بعدين البنات اللي يمثلو انهم اخواتها يلتفو حولينها و يغنولها هنو العروسة و يصفقو و لمن يخلصو ياخدو الحنة من الزبدية يخطولها هيا في يدها لحسه .. و تدخل بعدين ورى الستارة و أشرت للمنقشة تبدأ تنقشها .. ههههه و المنقشة ياحليلها تغططططرف ..
    و البنت اللي مثلت دور الام طلبت منها اول ما تبدا المنقشة تنقش هيا تاخد المبخرة تبخر البنات الضيوف و تعطيها لوحدة من البنات عشان تبخر الابلات و المرشات كمان نفس الحكاية و اشرت يبدأو بتوزيع النقل .. و فضي المسرح و شغلت وقت التوزيع انشودة جلست يا محلى كساها هذي العروس ..
    المنقشة تنقش ورى الستارة ( الستارة خليتها قماش تل عشان البنات يشوفو ) .. تفاجأت بصعود 3 معلمات للمسرح و المنقشة انتهت و جرو العروسة يبغو يشوفو هيا مين .. و جرو الكرسي و قدموه لقدام و خلوها تقعد و ترفع يدها بالنقش و شوفو التصفيير و الزعيق @_@ و انا اقول في نفسي يؤ خربو المشهد المفروض ما تندر هههههههههههههه بس شكلو المعلمات اتحمسو ..

    الموهم وقت النهاية انتبهت المنقشة ضاربة الباب @_@ و جري وراها ابغى اقولها فين رايحة ما نقشتي البنات في المدرسة و خرجت و عبال ما تناديها الخالة .. و لمن دخلت قلتلها ليه رايحة .. قالت مني رايحة بس خرجت اجيب اغراضييي هههههههههههههه اتونست الحرمة كانت تبغى تروح الساعة 10
    و انا راجعة الساحة اسمعهم شغلو الزفة تاني و استغربت حتى ما شفت كيييف انهو الفقرة .. بس لمن دخلت خليت المنقشة تقعد على ركن مسوينو زي قعدة اهل مكة زمان و المعلمات يطالعو فيا و يبتسمو و انا داخلة اشرت لوحدة منهم من اللي طلعت على المسرح قلتلها المنقشة هناك على طوووووووول قامت و تنقشت ههههههههههه
    و كنت زعلانة حسيت الشغل اتخبص ولا ازيدكم مع الهلمة دي كانت مشرفتي موجودة و جات كمان من غير ما تدينا خبر ولابسة خليجي زيهم @_@
    و اتفاجأ بوحدة من بنات سنة ثالثة تأشرلي اشارة أوكي و تقولي فقرتكم كذاااا .. << طبعا انا مني مقتنعة لاني تناحلت و لا شفت الشغل الممتاز كان جيد ..
    و لمن جيت اوقع خروج وقت الصرفة المعلمات يقولولي فقرتكم نيووو و مرررة حلوة و اول مرة نعرف الغمرة المكاوية .. طبعا انا كدا @_@ .. و مني مقتنعة قلت شكلهم يجاملوني لانهم اساسا معلماتي كنت ادرس في دي المدرسة ...
    و المشرفة كمان راحت و لا قالتلنا و صارت زحمة حولين النقاشة نحنا نفسنا اللي جبناها ما قدرنا نتنقش و قلنالها تاخد على اليد 5 ريال بس .. و حتى لمن جينا نديها فلوس يد البنت العروسة قالت والله ما اخد << لانها تونست ههههههههههههه
    الموهم اليوم الصبح جاتني رسالة من المشرفة كانها كبت على قلبي موية بااااردة ارسلتلي : صبحك الله بالخير : بارك الله في مجهودك في النشاط أمس . لك مستقبل واعد في مسرحة المناهج ...
    انا قريت الرسالة صار راسي كبييييييييييييير خصوصا انها ارسلتها بس ليا و زميلاتي اللي معايا رغم انهم ساهمو الا انها ما ارسلتلهم شي .. بصراحة كل الحوسة ديك و هما كانو يقاعدين زيهم زي البنات على كراسي و يتابعو الفقرات و لا اهتمو حتى بالتدريب فكانت رسالة المشرفة مبردة للقلب و مؤكدة انو الشغل كان حلو رغم انو في نظري كان لا هههههه
    و النقاشة دقت على البنات تقولهم الله يفتحلكم ابواب الرزق << شكلها كسبببت كثييييير .. هههه قالولولها متى خرجتي قالت كان باقي 3 بنات و المدرسة فضيت و مصرين الا انقشهم ههههه .. و قالولها كنا نبغى نتنقش مع الزحمة ما قدرنا .. قالت : لو قلتولي والله انقشكم مجانا ..

    و بس و بكدا انتهت حوسة النشاط و الغمرة على خير ..

    اراءكم
    توقيع

  8. مشاركه 8
    ☆ مدير مكتب معتمد☆
    رقم العضوية : 4978
    تاريخ التسجيل : Oct 2010
    المشاركات: 350
    التقييم: 400
    الدولة : ام القرى

    افتراضي رد: فزعتكم يا أهل مكة


    ماشاءالله روووعه

    مبرووك عليك الانجاز والتميز والله يوفقك ياعسل
    توقيع

معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

الأعضاء الذين شاهدو الموضوع: 0

الكلمات الدلالية لهذا الموضوع

المفضلات

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  

vBulletin Skins & Themes 

جميع الحقوق محفوظة لمنتديات الملكة للجودة

تصميم النور اونلاين لخدمات الويب المتكاملة